ہری پور(وائس آف ہزارہ)ڈاکوؤں نے سٹور میں گھستے ہی اندھادھند فائرنگ شروع کردی۔ سٹور کا مالک گولیاں لگنے سے شدیدزخمی۔ اس ضمن میں ذرائع نے بتایاکہ تھانہ کوٹ نجیب اللہ کی حدود میں واقع سرائے گدائی کے ایک جنرل سٹور میں دوڈکیت گھس گئے۔ جنہوں نے سٹور میں داخل ہوتے ہی سٹور کے مالک نوید خان ساکنہ موہری ملیاں پر اندھا دھند فائرنگ شروع کردی۔ نوید خان نے چھپ کر اپنی جان بچانے کی کوشش کی تاہم اس کی دونوں ٹانگوں میں گولیاں آر پار ہوگئیں۔ ڈاکو سٹور کے کاؤنٹر سے رقم لوٹ کر فرار ہوگئے۔ سی سی ٹی وی فوٹیج کے مطابق ڈاکوؤں نے موٹرسائیکل کے ہیلمٹ پہن رکھے تھے۔ نوید خان کو شدید زخمی حالت میں ٹراما سنٹر ہری پور منتقل کردیاگیاہے۔ تھانہ کوٹ نجیب اللہ میں مقدمہ درج کرکے تفتیش شروع کردی گئی ہے۔
