جے آئی ٹی نے 14 مقدمات کی تفتیش مکمل کر لی، سازش کا عنصر واضح ہے، شواہد حاصل، چالان جلد عدالت میں جمع کرایا جائیگا۔
لاہور(وائس آف ہزارہ) سانحہ 9 مئی کی مشترکہ تحقیقاتی ٹیم نے 14 مقدمات کی تفتیش مکمل کر لی ہے۔ تحقیقات میں چیئر مین پی ٹی آئی 10 نامزد مقدمات میں قصور قرار دیدئیے گئے ہیں۔ جے آئی ٹی کے مطابق چیئر مین تحریک انصاف کے خلاف مرکزی مقدمہ 23/96 کا چالان دو ہزار صفحات پر مشتمل ہے، چیئر مین پی ٹی آئی کے خلاف سوشل میڈیا سے متعلق چارسو سے زائد شواہد ملے۔گرفتار ملزمان کے بیانات اور نشاندہی پر چیئر مین کو گنہ گار قرار دیا گیا ہے۔ جناح ہاؤس حملے میں براہ راست ملوث 80 ملزمان کے بیانات میں سازش کا عنصر واضح ہوا ہے۔ جے آئی ٹی حکام کا کہنا ہے کہ دوران تفتیش نومئی کے واقعات پر براہ راست سازش کے شواہد بھی ملے۔ چیئر مین پی ٹی آئی کے اپنے بیانات حالات سے متضاد پائے گئے۔ جے آئی ٹی حکام کا مزید کہنا تھا کہ دیگر نو مقدمات میں بھی ٹھوس شواہد کی روشنی میں چیئر مین پی ٹی آئی گنہگار قرار پائے۔ 14 مقدمات کا چالان جلد عدالت میں جمع کروا دیا جائے گا۔
