ایبٹ آباد(وائس آف ہزارہ) ٹی ایم اے اہلکاروں کی ملی بھگت سے دہمتوڑبائی پاس کے اطراف میں تعمیرات۔ اسسٹنٹ کمشنر نے تعمیرات رکوادیں۔ اس ضمن میں ذرائع نے بتایاکہ ٹی ایم اے اہلکاروں کی ملی بھگت سے دہمتوڑبائی پاس کے اطراف میں بلڈنگ لائن کی خلاف ورزی کرتے ہوئے سرکاری زمین پرتعمیرات شروع کردی گئی ہیں۔ جس کی وجہ سے اس روڈ کو بھی تنگ کردیاجائے گا۔ ڈپٹی کمشنر ایبٹ آباد نے ان تعمیرات کا نوٹس لیتے ہوئے اسسٹنٹ کمشنر تھری کو موقع پر بھیجا تو دہمتوڑ بائی پاس کے اطراف میں کئی جگہوں پر تعمیراتی کام جاری تھا۔ جس پر یہ کام رکوا دیا گیا۔ مقامی لوگوں سے کہاگیا ہے کہ دہمتوڑبائی پاس کے اطراف میں تعمیرات سے قبل ٹی ایم اے سے نقشہ کی منظوری کروائیں۔بصورت دیگر ایسی غیر قانونی تعمیرات کو آپریشن کے ذریعے مسمار کر دیاجائے گا۔
